АҞӘА, жәабран 20 - Sputnik. ГРУ уаанӡатәи аполковник, Солсбери ахәшә зырҭаз ҳәа ирҳәо Сергеи Скрипаль иан аполициа рахь аҳәара ҟалҵеит лԥеи лмоҭеи хабарда ибжьаӡыз ҳәа иршьарц. Абри атәы аанацҳауеит РИА Новости Скрипаль иашьа иԥҳа Викториа Скрипаль лажаәқәа шьаҭас иҟаҵаны.
"Елена Иаков-иԥҳа аполициа рахь арзаҳал налгеит Сергеи Иулиеи хабарда ибжьаӡыз ҳәа рыԥшаара иалагарц. Ҳгәыӷуеит, аусҭҵаара мҩаԥысуанаҵы дара ахьыҟоу аилкаара алшап ҳәа", - лҳәоит лара.
Хәажәкыра 4 рзы Солсбери, Британиатәи амаҵзура ҷыдақәа аус рыцызуаз, уаанӡа ГРУ аус зуаз Сергеи Скрипали иԥҳаи ахәшә рырҭеит.
Абри аан ахархәара аман Урыстәыла иҭыжьу амаҭәашьар А234 "Новичок" ҳәа аҳәамҭа ҟанаҵеит Британаитәи амаҵзура ҷыда.
Иара убри аан иарбанызаалак Урыстәыла ахара ахаразтәыша ршаҳаҭга ыҟан иҟамызт.
Москва акәзар, имҩаԥысуа провокациоуп ҳәа ахнаҳәаауан. Владимир Путин иакәзар иазгәеиҭеит Урыстәыла ахимиатә бџьар амам ҳәа.
Ииасыз амҽышазы аҭыжьымҭа Times адырра ҟанаҵеит Скрипаль игәабзиаратә ҭагылазаашьа бааԥсуп, аҩны амедицинатә цхыраара ирҭоит ҳәа. Убри аан Times иазгәанаҭоит аҳақьымцәа уи игәабзиара аиҭашьақәыргылара алшап ҳәа ишымгәыӷуа.
Викториа Скрипаль лгәаанагарала, лаб иашьа иԥсы ҭамзар ҟалоит избанзар иԥсы ҭаны дыҟазар, хымԥада иан дыррак лимҭар ауамызт.
