АҞӘА, жәабран 21 - Sputnik. Еиду аштатқәа рхада Дональд Трампи Австриа аканцлер Себастиан Курци реиԥылара ашьҭахь Курц аҳәамҭа ҟаиҵеит Вена фымцамчла аҽеиқәыршәараз аинтерес аманы ишыҟоу иагьшагәҭаку апроект "Северный поток – 2" адгылара аҭара. Абри атәы аанацҳауеит РИА Новости.
"Трамп иаартны иҳәеит Еиду аштатқәа апроект ишаҿагыло. Ҳара ҳакәзар апроект ҳадгылоит избанзар фымцамчла аҽеиқәыршәараз аинтерес ҳаманы ҳаҟоуп", - иҳәеит Курц.
Курц иазиԥхьаӡоит Трамп бизнесуаҩык иҳасаб ала еиликаар шакәу Вена урыстәылатәи агаз изадгылоу иара ахәԥса еиҳа иахьылаҟәу шакәу. Егьыс, иара игәаанагарала Австриеи Урыстәылеи реизыҟазаашьақәа Австриеи Вашингтони реизыҟазаашьақәа акала иреиӷьым.
Иара убри аан Курц игәаанагарала Москва Вена анырра еиҳа иаҭахуп Вашингтон аасҭа.
Апроект "Северный поток-2" иазыԥхьагәанаҭоит 55 миллиард кубометр агаз Урыстәылантәи Балтиатәи амшын аҵала Европаҟа ииазго агазмҩангагақәа ҩба рышьҭаҵара.
Агазмҩангага ашьҭаҵара хыркәшахоит 2019 шықәса анҵәамҭазы. Агазмҩангага ашьҭаҵара азин ҟарҵахьеит: Германиа, Финляндиа, Швециа.
Иара иаҿагылоит Америкеи Украинеи. Апроект аполитикатә ҟазшьа амоуп ҳәа иахцәажәоит Латвиа, Польша, Литва.
Москва изныкымкәа иазгәанаҭахьеит агазмҩангага нырратә хархәаганы ишшьатәым. Германиа аиҳабыра ракәзаргьы "Северный поток - 2" економикатә проектны иахәаԥшуеит.
