"Акоммунизм теориак аҳасабала иара ҟалашьа змам ак акәын. Ҳәарада, иарбан хҭысзаалакгьы иамоуп аԥшшәқәа рацәаны, ус еиԥш Асовет мчра иацуп абзиеи ацәгьеи, зегьы ирыцку иаҳа ирацәоу арбан аилыргароуп. Аԥсуааи Аԥсныи рыстатус, рформа азы Асовет мчра ааира иаҳа ирзеиӷьхеит ҳәа сахәаԥшуеит, иаиаанӡа аасҭа. Антон Деникин ишәҟәаҿы иҳәоит аҟаԥшьқәеи ашкәакәақәеи реиҿагылараҿы ашкәакәақәа аиааира ргазҭгьы, Аԥсны даҽакхон ҳәа. Иара ашәкәакәақәа раԥхьагылаҩцәа дыруаӡәкын уи ауп ус зиҳәоз. Иара ақыртцәа Аԥсны ус шәымаӡам, Аԥсны Урыстәыла иатәуп ҳәа акәын ииҳәоз. Асовет мчра иаанагаз абзиарақәа рахь раԥхьа инаргыланы ирыдукылар ҟалоит аҵара, акультура зегьы аизҳара. Иаҳцәагаз аҵасқәагьы ыҟоуп, аха урҭ ԥхьаҟа ҳазгоз ракәымызт, иаҳҳәап, ашьоура - ажәлар маҷ ақәӡаарахь иназго акәны сахәаԥшуеит", - ҳәа азгәеиҭеит Аҩӡба.
Инеиҵыху аицәажәара шәазыӡырҩыр шәылшоит арадио Sputnik Аԥсны аефир аҿы.
