АҞӘА, хәажәкыра 13 – Sputnik. Ашьапылампыл асразы аԥҟаррақәа реиҭакра ConIFA аверсиала Европа ачемпионат иаԥырхагам ҳәа еиҭеиҳәеит ConIFA ахада ихаҭыԥуаҩ Дмитри Паӷәаа аҩаша, хәажәкыра 12 рзы.
"ConIFA Арцах имҩаԥысуа Европа ачемпионат аҿы ажәытә ԥҟаррақәа ирықәныҟәалоит, аха егьырҭ ԥхьаҟатәи ачемпионатқәа раан аԥҟарра ҿыцқәа алагалахоит", - ҳәа иҳәоит Паӷәаа.
ConiFA аверсиала Европа ачемпионат мҩаԥысраны иҟоуп 2019 шықәса, рашәарамза 1-10 рзы Ашьха Ҟарабах аҳҭнықалақь Степанакерт аҿы.
Ашьапылампылтә ассоциациақәа Жәларбжьаратәи рхеилак (IFAB) 2019 шықәса хәажәкырамзазы ашьапылампыл аԥҟаррақәа рыԥсахра аус аднаулеит. Аԥсахрақәа рахь иаҵанакуеит: ампыл амба иҭазыршәыз машәыршәа акәзаргьы напыла ампыл дахьысзар еилагароуп ҳәа иԥхьаӡахоит, ирыԥсахуа ахәмарҩы ашьапылампыл-дәы аанижьроуп еиҳа ирзааигәоу агантә цәаҳәала, иара убасгьы пенальти аан амбахьчаҩ амба шьапык ала дахьысыр ҟалоит.
Аԥсахрақәа амчра роуеит 2019 шықәса, аԥхынразы.
