"Хәажәкырамза 1999 шықәса рзы иҟалаз ахҭысқәа рыла алкаақәа ҩба ҟауҵар ҟалоит. Иҟоуп аилкаара "иҩынтәу астандартқәа" ҳәа, убри ибзиаӡаны рхы иадырхәоит мраҭашәаратәи аҳәынҭқаррақәа. Иугославиа абомба алажьра иҟалаз, еиҳарак Косово Сербиа иадхны агаразы, Еиду амилаҭқәа реиҿкаара асанкциа аман, ари ахҭыс ҭаҳҵаауеит ҳәа ҳалагар, ирацәоуп уи зыхҟьаз амзызқәа. Балкан амилаҭтәра аполитика бааԥс мҩаԥыргон, аҳәынҭқарра еидызкылоз адиктатура мацара акәын. Иугославиа анапхгаҩыс иҟаз Иосиф Бростито данца ашьҭахь, аҳәынҭқарра аилаҳарахь ахы архо иалагеит. Асовет Еидгыла еиқәырханы иҟазҭгьы, ас еиԥш адунеижәларбжьаратәи аҭагылазаашьа аҽаԥсахуамызт, Иугославиагьы убас иҟалаӡомызт. Иҩынтәу астандартқәа "ибзиаӡаны" имҩаԥыргоит Мраҭашәаратәи аҳәынҭқаррақәа. Амилаҭтәра аполитика цәгьа Балкан иӷәӷәаны аҭыԥ змаз. Ара аӡәы аҷын иқәкны, уи ихароуп ҳәа аҳәара уадаҩуп", - азгәеиҭоит ҷыдала Ҳагба.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.
