АҞӘА, хәажәкыра 26 - Sputnik. Apple асервис ҿыцқәа ԥшьба ӡырнагеит – ажурналқәеи агазеҭқәеи аҽрыҵаҩра, App Store аҿы ахәмаррақәа аҽрыҵаҩра, ахатәы кредиттә хсаалеи, автортә контент змоу видеостримингтә сервиси.
Аилахәыра иӡырнагеит асервис Apple News+, iTunes аҿы аиԥшҵәҟьа альбомқәеи атрекқәеи ааухәар ахьалшо. Аалыҵ ахәԥса - 9.99 доллар мызказы.
Уаанӡа ишырҳәоз ала, агазеҭқәеи ажурналқәеи рыԥхьаразы иҷыдоу аинтернет-еимадара аҭахны иҟалом.
Акорпорациа иара убасгьы адунеи аҿы иреиҳау аинвестициатә банк Goldman Sachs аус ацызуа атитан иалху ахатәы кредиттә хсаала Apple Card ҭнажьраны иҟоуп.
Афинансқәа рҭаҩра амҩаԥгаразы Apple Wallet ацҵагьы ҭнажьлоит.
Apple ахәмаррақәагьы гәыгәҭанамыжьит, ахәмаррақәа App Store - Apple Arcade аҽрыҵанаҩрагьы ӡырнагеит. Асервис аусура иалагоит ҭагалан.
Авидеостримингтә сервис Apple TV+ - ари аилахәыра аалыҵ ҷыдоуп. Иара андаҭлараны иҟоуп аилахәыра Netflix. Аҵыхәтәантәи акәзар, аекспертцәа ишырҳәо ала, 2019 шықәса анҵәамҭазы 139 миллионҩык ахархәаҩцәа аман.
Апроект иапартниорцәахеит аҳақәа: HBO, Showtime, Starz. Астримингтә сервисқәа Netflix, Hulu ари апроект иалахәым.
Асервис аконтент Apple аплатформаҿ мацароуп ахархәара ахьаиуа.
Ииасыз амчыбжь азы Apple AirPods, iPad, iMac рверсиа ҿыцқәа ӡырнагеит.
