АҞӘА, мшаԥы 3 – Sputnik, Бадри Есиава. Аԥснытәи аспортсмен Сандро Ашәба ахьтәы медал ианашьахеит Москватәи астуденттә спортхәмаррақәа рҿы ҳәа Sputnik иазааицҳаит аспортсмен иазыҟаҵаҩ Игор Бераиа.
Бераиа иажәақәа рыла 19 шықәса зхыҵуа ақәԥаҩ Москватәи аргыларатә институт аҩбатәи акурс аҿы аҵара иҵоит.
"Сандро хәышықәсоуп зых иақәиҭу ақәԥара инапы алакуижьҭеи. Аԥхьатәи аԥшьышықәса Аԥсны иҽазыҟаиҵон. Нас, Москваҟа аҵара ҳәа дцеит. Аԥеиԥш змоу ҷкәыноуп. Илшо ҟаиҵоит уажәазы аҵареи аспорти реимадара амҷк ишицәыуадаҩугьы"́, - ҳәа азгәеиҭоит Бераиа.
Зых иақәиҭу ақәԥараз Москватәи атурнир мҩаԥысуан 2019 шықәса, мшаԥы 3-4 рзы. Атурнир иалахәын шәҩык инарзынаԥшуа аҿар.
