АҞӘА, мшаԥы 4 - Sputnik, Бадри Есиава. Аԥсны ахада иалхрақәа раан абжьыҭишьеи атехникатә еиҿкаашьеи рыԥсахит ҳәа аҭыԥ аҟынтәи адырра ҟаиҵеит Sputnik акорреспондент.
Апарламентари Илиа Гәниа иаԥшьгамҭала азакәан апроект Жәлар Реизараҿы ирыдигалеит адепутат Валери Агрба. Апарламент аҿы аҩбатәи, аҵыхәтәантәи аԥхьарала ирыдыркылаз азакәан апроект инақәыршәаны, абжьыҭираан анацәа адыргаҭареи акандидатцәа рыҵәаӷәара аформеи аԥыхуп.
Уи адагьы абжьыҭираан иаԥыххоит аҽамхратә талонқәа рхархәара, иркьаҿхоит алхратә фондқәа рзы алагалахыԥхьаӡарақәа. Иара убасгьы уажәшьҭарнахыс аҳәаанырцәтәи атәылауааи аиҿкаарақәеи кандидатк идгыланы ахҭагалареи акциақәеи рымҩаԥгара азин роуам.
Агрба иажәақәа рыла, аԥсахрақәа азырхоуп алхрақәа еилыкка рымҩаԥгаразы. Азакәан апроект еицҿакрыла ирыдыркылеит.
