Ҷыҭанаа: акамшьиа акра аамҭа ибзиан ихыркәшоуп ҳәа азуҳәар алшоит
"Акамшьиа акра хыркәшахеит хәажәкыра 31 рзы. Сынтәа Амшын еиқәаҿы имҩаԥгаз аҭҵаарақәа рыла еилкаан аԥсыӡ бзианы ишыҟаз, азин ыҟан 69 нызқь тонна акра. Аԥсны амшын ҳәаақәа рҿы аус руан аԥсыӡ зкуаз 24 ӷба, аԥсыӡ мҩанызгоз - 16 ӷба. Иахьазы иҳамоу адыррақәа рыла иркит 66 нызқьи 300 тонн акамшьиа, абри алагьы асезон ибзиан ихыркәшоуп ҳәа азуҳәар алшоит. Ҳәарада, аилагарақәа ыҟан, аха урҭ рахьынтә зынӡа иџьбараз ҳәа иалкаан акгьы сызҳәом. Амшын аԥшаҳәа иазааигәан аԥсыӡкразы ҳәа 16 еилагара ыҟан, урҭ зегьы рыла актқәа шьақәыргылоуп, аԥҟарақәа еилазгаз ахараԥса дыршәоуп", - азгәеиҭеит Ҷыҭанаа.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.
