АҞӘА, мшаԥы 23 - Sputnik. Шри-Ланка аиҳабыра аҭыԥ змаз атеррактқәа Зеландиа Ҿыц иҟаз ахҭысқәа ирҭакуп рҳәеит. Абри атәы аанацҳауеит РИА Новости ателеканал News 1s адыррақәа шьаҭас иганы.
"Аусҭҵаара иаанарԥшуеит ажәыларақәа аҭыԥантәи аекстремистцәа ишымҩаԥыргаз. Урҭ Зеландиа Ҿыц, Краистчерч аџьаамақәа ҩба рҟны хәажәкыра 15 рзы иҟалаз ахысрақәа ирҭакуп ҳәа ҳахәаԥшуеит", - ҳәа ателеканал аҟны аҳәамҭа ҟалҵеит амассатә информациа ахархәагақәеи атәылахьчареи рминистр Рувана Виевардене.
Виевардене аԥжәарақәа рзы аҭакԥхықәра адылҵеит аиҿкаара National Thowfeek Jamaath.
Амҽышаҽны Шри-Ланка инеиқәырццак-еиқәырццакны аԥжәарақәа ааба аҭыԥ рыман. Аԥхьатәи аԥжәарақәа ҟалеит акатоликцәа руахәамақәа рҿы, егьырҭ ахԥа – асасааирҭақәа рҿы, егьырҭ аԥжәарақәа еиуеиԥшым аҭыԥқәа рҿы.Иҭахаз рхыԥхьаӡара 310-ҩык рҟынӡа инаӡоит, 480-ҩык ахәрақәеи аахақәеи роуит.
Шри-Ланка амчрақәа абри аамҭала иааныркылеит 40-ҩык рҟынӡа ауааԥсыра, иҟалаз аԥжәарақәа ирыдҳәалоуп ҳәа ргәы иззаанаго.
Аԥсны ААР Шри-Ланка иҟалаз атҟәацрақәа инарымаданы ирыдышшылеит
Зеландиа Ҿыц, Краистчерч аџьаамақәа ҩба рҟны хәажәкыра 15 рзы иҟалаз ахысрақәа ирыхҟьаны ауаа рацәа ҭахеит, ирацәаҩын ахәрақәа змазгьы.
Ақәылара ҟазҵаз ауаҩы Брентон Таррант шьҭрала д-Австралиатәын, аха Зеландиа Ҿыц дынхоит.
Иара 28 шықәса ихыҵуеит. Иҟаиҵаз аус гәҭакыс имоуижьҭеи акрааҵуазаап. Ажәылара аламҭалаз асоциалтә ҳақәа рҿы иабџьар афотосахьа ықәиргылеит, Франциатәи атерактқәа рзы ашьоура шымҩаԥиго анҵаны. Ишырҳәо ала, иара ааӡара бзиа иман, ахәыҷқәа аспорт иазыҟаиҵон, убри аан аԥарагьы рымихуамызт.
