"Лаҵарамза 7 рзы амузеи аҿы имҩаԥахоит аԥсадгьыл ахьчареи абзиабареи ирызку аусмҩаԥгатәқәа. Уи иалахәуп 4-6 аҳҭнықалақь абжьаратә школқәеи, алицеи-интернат аҵаҩцәеи. Араҟа уи аҽны иҟалоит аныҟәарақәа, ахәыҷқәа ажәеинраалақәа ирыԥхьоит, ашәақәа нарыгӡоит. Аҵаҩцәа идҳарбарц ҳгәы иҭоуп адокументалтә фильм "Санчара. Аԥсра ашьҭахь". Иара убас имҩаԥгахоит аԥсадгьыл ахьчареи абзиабареи ирызку алекциақәа – ари зегьы мышкы иалагӡаны ауп. Лаҵарамза 14, Владислав Арӡынба иирамш аҽны, изқәаҭыԥаҿ ашәҭқәа шьҭацахоит, анаҩс лаҵарамза 18 рзы Аԥснытәи амузеиқәа ракциа "Аҵх амузеи" аҿы ҳаргьы ҳалахәхоит. Аҭааҩцәа идырбахоит аекспозициа ҿыцқәа, урҭ рахьтә иалукаақәо иреиоуп Аԥсны раԥхьатәи атәылахьчара аминистр Владимир Аршба изку аекспозициа. Еиҿкаахоит ажәеинраалақәа исахьаркны раԥхьаразы аицлабра. Ари амз амузеи азы ибеиоуп еиуеиԥшым аусмҩаԥгатәқәа рыла, ара еиҿкаахоит даара аинтерес зҵоу аусхкқәа", - азгәалҭеит Беиаԥҳа.
Инеиҵыху аиҿцәажәара шәаҳар шәылшоит арадио Sputnik Аԥсны аефир аҟны.
