АҞӘА, рашәара 3 – Sputnik. ЕАА амаӡаныҟәгаҩ хада Маик ПомпеоТегеран аполитика ишаҿыгылогьы адиалог иазыхиоуп ҳәа иҳәеит.
Убри аан Помпео YouTube ала иддырбоз апресс-конференциаҿ иазгәеиҭеит ЕАА Иран аҿцәажәара ишазыхио уи "ҳәынҭқаррак аиԥш ахы мҩаԥнаго ианалагалак".
Аҵыхәтәантәи амзазы Америкеи Ирани реизыҟазаашьақәа акыр рыҽдырххеит. Америкатәи амчрақәа Иран аекономика ҵызшәаауа асанкциақәа аларгалеит.
Вашингтон иахықәкуп Исламтәи ареспублика ахымҩаԥгашьа аԥсахра. ЕАА, исламтәи ареволиуциа ахьчаҩцәа Ркорпус террористтә еиҿкаароуп ҳәа рыланаҳәеит. Уи аҭакс Иран ЕАА рыррамчқәа ркомандаҟаҵаратә центр (CENTCOM) террористтә еиҿкаароуп, ЕАА акәзаргьы атерроризм спонсорцәас иазыҟоуп ҳәа рҳәеит.
Абри ашьҭахь амилаҭтә шәарҭадаразы ЕАА ахада иабжьагаҩ Џьон Болтон иҳәеит Иранҟа ахы шархо авианосец "Авраам Линкольн".
Убри аан Дональд Трамп иазгәеиҭеит Ирани Америкеи реибашьра ҟаларым ҳәа дышгәыӷуа. Али Хаменеи иакәзаргьы иҳәеит Иран аибашьра гәҭакны ишамам.
