АҞӘА, рашәара 17 – Sputnik, Бадри Есиава. Уажәы ахыб ақәҵареи абетонтә еихагылабжьара аиҭашьақәыргылареи ҳарҿуп ҳәа Sputnik иазеиҭеиҳәеит аҳәынҭеилакы "Аԥсныргылара" ааглыхра-техникатә ҟәша аҟаза Дауҭ Ладариа.
"Аамҭалатәи ахыб аман, ақәоурақәа раан иахьчаразы. Ажәытәтәи ахыб ахаҳхит, уажәы аихагылабжьаратә еибаркыра ақәырҭәара ҳаҿуп. Уи уаанӡатәи аасҭагьы иӷәӷәахоит. Хара имгакәа афымцацәаҳәақәа рышьақәыргылара ҳалагоит, нас ахыркәшаратә усурақәа хацҳаркуеит", - ҳәа еиҭеиҳәоит Ладариа.
Иара иажәақәа рыла абетонқәырҭәара уаанӡатәи аасҭа ихьанҭахоит, аха уи ашьаҭа ԥырхаган иаиуам.
Адлеиԥҳа: Аҟәа иблыз аҩбатәи ашкол аҿы актәи акласс ахь ахәыҷқәа рыдыркылоит>>
Ашкол аҭыӡқәеи ашьаҭеи ахыбра ахаҭа аиҭаргылараан идырӷәӷәаӷьан ҳәа азгәеиҭоит Ладариа.
"Абетон шааибаклак, аамҭалатәи ахыб ахаҳхуеит. Аҿыц ашьақәыргылара ҳалагоит. Ахыб иқәаҳҵо аметаллкыц ахаҭабзиареи аӷәӷәареи аманы иҟоу ҳашьҭан. Аҵыхәтәан Ростов иҳауит иҳаԥшаауаз", - иҳәоит иара.
Иара убасгьы, иара иажәақәа рыла, ашкол ахыб иагоит 2600 метрԥшьыркца аметаллкыц. "Амҿымаҭәахә Урыстәыла иааҳхәеит. Хынтә амцацәыхьчаратә лак ахьаҳшьит. Асеиԥш иҟоу алак есхәышықәса рахь знык иахьшьлатәуп", - иҳәеит Ладариа.
Аԥсны АҶА: аҵараиурҭақәа рҿы амцакрақәа еиҳарак ацәаҳәақәа реидыслара иахҟьоит>>
Абетон ақәырҭәареи ахыб ақәҵареи рнапы алакуп ҩажәаҩык аусуҩцәа. Арҭ аусурақәа рышьҭахь аклассқәеи акабинетқәеи рҿы афымцацәаҳәа ҿыцқәа мҩаныргоит.
