АҞӘА, рашәара 25 - Sputnik. Аԥсны ахада Рауль Ҳаџьымба Ашәарҭадаратә хеилак аилатәараан рашәара 24 рзы иҳәеит қарҭаа мап ацәыркроуп атермин "аоккупациа зызуу аҵакырадгьылқәа" ҳәа.
Атәыла ахада иазгәеиҭеит Аԥсны ихьыԥшым ҳәынҭқарроуп, азиншьаҭа аманы Урыстәылеи иареи аусеицура мҩаԥыргоит ҳәа. Атәылақәа реизыҟазаашьа наҟ-ааҟгьы аинтерес еицырзаҵаны иҟоуп ҳәа ишьоит иара.
Абри атәы аанацҳауеит атәыла ахада иофициалтә саит.
"Иахьа Қырҭтәыла имҩаԥысуа ахҭысқәа ҩныҵҟаполитикатә еиҿагылароуп. Урҭ рлахәылацәа Урыстәыла ахара ахаҵара рҽазыршәоит. Қарҭаа мап ацәыркроуп атермин «аоккупациа зызуу аҵакырадгьылқәа» ҳәа Аԥсни Аахыҵ Уаԥстәылеи рганахь ала, рыпроблемақәагьы рыӡбаралоуп ихьыԥшым ҳҳәынҭқаррақәа аламгалакәа", - иҳәеит иара.
Аԥсны адәныҟатәи аусқәа рминистр Даур Ақаҩба иҳәеит изаамҭанытәиу Женеватәи аиҿцәажәарақәа раан ари азҵаара шышьҭырхуа.
