АҞӘА, ԥхынгәы 11 – Sputnik. Урыстәылатәи аџьармыкьахь инеиуа ақырҭуа рыжәтәаалыҵ ретикеткақәа рҿы Аԥсныи Аахыҵ Уаԥстәылеи автономтә республикақәак рыҳасаб ала излоу Қырҭтәылатәи ССР ахсаала ануп ҳәа аҳәоит Урыстәыла иҟоу Аахыҵ Уаԥстәыла Ацҳаражәҳәарҭа асаит аҿы.
Абри аан иазгәаҭоуп Ацҳаражәҳәарҭа абри азы Урыстәыла Адәныҟатәи аусқәа рминистрра адырра шанаҭаз.
"Қырҭтәыла имҩаԥысуа аҵыхәтәантәи ахҭысқәа угәаладыршәоит анационалист З. Гамсахурдиа иаамҭақәа", - аҳәоит Урыстәыла иҟоу Аахыҵ Уаԥстәыла Ацҳаражәҳәаҩ Знаур Гасиев иҟаиҵаз ахҳәааҿы.
Убри аан Гасиев иажәақәа рыла, ари аҩыза ахсаала иара Қырҭтәыла ашьауӷа уақәзыршәо усуп ҳәа.
Урыстәылеи Қырҭтәылеи рыбжьара адипломатиатә еизыҟазаашьақәа ыҟам. Атәылақәа рыбжьара адиалог мҩаԥысуеит Женеватәи аиҿцәажәарақәа рҳәаақәа ирҭагӡаны.
