АҞӘА, нанҳәа 22 – Sputnik, Бадраҟ Аҩӡба. Гәдоуҭа ақалақь Апрокуратура ашьаус хацнаркит Аԥсны ахадарахьы акандидат Олег Аршба Мгәыӡырхәа ақыҭан иҟоу иштаб аихсра ахҭыс инамаданы, абри азы адырра ҟанаҵеит Аԥсны Аҩнуҵҟатәи аусқәа рминистрра апресс-маҵзура.
Аԥсны ахадарахьы акандидат Олег Аршба иштаб ишеихсыз азы Гәдоуҭа араион Аҩнуҵҟатәи аусқәа русбарҭахь адырра ҟалеит нанҳәа 21, асааҭ 10:30 рзеиԥш.
Аҭыԥ ахь инеиз аусҭҵаара-оперативтә гәыԥ еилыркааит нанҳәа 21 асааҭ 01:00 - 09:00 ирыбжьанакыз аамҭазы иеилкаам ахаҿы иеилкаам абџьар ала Аԥсны ахадарахьы акандидат Олег Аршба иалхратә штабс қьырала иргаз акаҳуажәырҭа "Нептун" дшеихсыз.
Аоперативтә усҭҵааҩцәа аҭыԥ аҟны ирыԥшааит излахысхьоу аџьазцәақәа быжьбеи ахы ахәҭақәа ԥшьбеи. Урҭ рыхкқәа макьана еилкаам.
Ахада иалхрақәа ҟалоит нанҳәа 25, 2019 шықәса рзы. Ахада далырхуеит хәышықәса аҿҳәара иҭаны. Хаҿык ҩ-ҿҳәарак иеиҳаны хадас аус иур ҟалаӡом. Ахада даналырхуа ахада ихаҭыԥуаҩгьы дицалырхуеит.
Иара убас шәаԥхьар ҟалоит:
-
Ахада иалхрақәа раан 700-ҩык инареиҳаны амилициа аусзуҩцәа ҷаԥшьалоит
-
Аԥсны АКХ: ахада иалхрақәа рҟны 116 нызқьҩык инареиҳаны рыбжьы арҭар ҟалоит
