АҞӘА, нанҳәа 25 – Sputnik, Асмаҭ Ҵәыџьԥҳа. Аԥснытәи аспортсмен Енвер Бзагоа аиааира игеит Анкара имҩаԥысуаз Апрофессионалтә бокс азы Жәларбжьаратәи атурнир аҟны, абри атәы Sputnik иазеиҭеиҳәеит Аԥсны Апрофессионалтә бокс азы афедерациа аиҳабы Альберт Карди-оӷлы.
Альберт Карди-оӷлы иажәақәа рыла 24 шықәса зхыҵуа абоксиор раԥхьа дгәарҭеит апрофессионалтә бокс ахәылԥаз "Аԥсны аҳәынҭқарра Ахраҿа" нанҳәа 13 рзы Афон ҿыц ианымҩаԥысуаз.
Аԥсуа боксиор диндаҭлон абокс азы Ҭырқәтәыла иеизгоу акоманда алахәыла, уи уаанӡа аринг аҟны имҩаԥигахьан 10 еиԥыларак, урҭ рахьынтә быжьба рҟын аиааира игахьан.
