АҞӘА, цәыббра 8- Sputnik. Иахьатәи Аԥсны ахада Рауль Ҳаџьымба ахада иалхрақәа аҩбатәи ртур аҟны макьаназы аиааира игоит ҳәа аарыцҳауеит Рауль Ҳаџьымба иштаб аҟны.
"Макьана еилкаау рыла, ирыԥхьаӡаз ала, аиааира ҳара иҳамоуп. Аиааира ҳәа сара сзышьҭоу - ҳажәлар риааира ауп. Егьырахь ҳаԥсҭазаараҿы ишьҭоу азҵаараақәа даараӡа ирацәоуп. Ҳахьӡартә еиԥш аамҭа Анцәа иаҳзааигааит", - иҳәеит Рауль Ҳаџьымба.
Аԥсны АКХ аофициалтә дыррақәа рыланаҳәоит ашәахьа, цәыббра 9 рзы.
Аԥсны ахада иалхрақәа актәи ртур мҩаԥысит амҽыша, цәыббра 8 рзы. Аԥсны Аҳәынҭқарра ахадарахьы иқәгылан ҩыџьа акандидатцәа - иахьатәи Аԥсны ахада Рауль Ҳаџьымбеи аоппозициатә партиа "Амцахара" ахантәаҩы Алхас Кәыҵниеи.
Ахада аамҭакала дицалырхуеит ихаҭыԥуаҩыс зыӡбахә иҳәо акандидат. Рауль Ҳаџьымба ихаҭыԥуаҩрахь кандидатс дицуп Аслан Барцыц, уи иахьатәи аамҭазы Аԥсны ахада Иусбарҭа аексперттә ҟәша аиҳабы имаҵура дахагылоуп. Алхас Кәыҵниа ихаҭыԥуаҩрахь кандидатс дицуп Жәлар Реизара - Апарламент адепутат Дмитри Дбар.
Аԥсны АКХ иаанацҳауеит атәылаҟны алхырҭатә ҭыԥқәа 152 шыҟоу, атәыла анҭыҵ ҩба - Москвеи Черқьесски.
Абжьыҭаразы азин рымоуп зықәра наӡахьоу Аԥсны атәылауаа зегьы, зжәытә тәылауаҩшәҟәқәа аҿыцқәа рыла изыԥсаххьоу.
