"Аҽаҩра хар амам, 30 тонна рҟынӡа аҵәа ҿыхны аҵәахырҭахь инаҳгахьеит. Аҩбатәи абаҳчаҟны аҵәа аҿыхра ҳаҿуп, уаагьы 40 тонна рҟынӡа аҽаҩра ҳауртә аҭагылазаашьа ыҟоуп, 70-80 тонна рҟынӡа аҵәа ҳауроуп. Ишахәҭоу аус адулазар 100 тоннак инацны иҟаларгьы алшон, аха ҳамч ахьынӡақәхоз аҟынӡа иааҳгеит. Иарбан усзаалакгьы аиҿкаара аҭахуп, уи аҟны еиҵахарақәак аныҟалалак алҵшәа иаҳа имаҷхоит. Аиҿкаара, аидгылара аныҟалалак, иарбан шәырхкызаалкгьы иҟамло ыҟам Аԥсны. Аҵәа аҽаҩра маҷ-маҷ аџьармыкьахьгьы инаҳгоит, аха хықәкыс иҳамоу иԥхасҭамхарц, ирласны иҿыхны аҵәахырҭахь анагароуп", - иҳәеит Чагәаа.
Иара иазгәеиҭеит аџьармыкьахь аҵәа 40 мааҭ ҳәа ишнарго, амала анаҩс уи ахә ҩынтәны иацҵаны ианырҭиуа ыҟоуп. Ашәыр ааӡаҩцәа ирцәыуадаҩуп рҽаҩра аџьармыкьаҟны аҭиира ҳәа азгәеиҭеит Чагәаа.
"Аџьармыкьаҟны аҭыԥ азҵаара изныкымкәа ишьҭаҳххьеит, ус еиԥш алшара ыҟазар ԥшьба-хәба мзы аҵәа агхартә иҟаҳҵомызт, аха уа аҭыԥ аиура хәыҷык иуадаҩзар ҟалап", - иҳәеит Чагәаа.
Иаҳа инеиҵыху анҵамҭа шәаҳар шәылшоит арадио Sputnik аефир аҟны.
