АҞӘА, жьҭаара 3– Sputnik, Асмаҭ Ҵәыџьԥҳа. Ҟәбина иҟоу Славианск акоманда актәи аҭыԥ ннакылеит аветеранцәа рыбжьара имҩаԥысуаз амҵәышәмпыл азы атурнир аҿы ҳәа Sputnik иазааицҳаит азыҟаҵаҩ Константин Мазов.
Атурнир "аразны" медал анашьахеит Аԥсны акоманда, "аџьаз" медал анашьахеит Новороссииск аспортсменцәа. Мазов иажәақәа рыла сынтәа атурнир аҩаӡара ҳаракы аманы имҩаԥысит. Аспортсменцәа зегьы азыҟаҵара бзиа рыманы иҟан.
"Ахәмаррақәа аинтерес рыманы имҩаԥысит. Иуҳәар ауеит акомандақәа еиваҟәало иҟан ҳәа. Аԥснытәи акоманда афинал аҟынӡа инаӡеит. Ахәмаррақәа хәба рҟынтәи ԥшьба рҟны ҳаиааиит, акы аҟны ҳаҵахеит", - иҳәеит иара.
Аветеранцәа рыбжьара имҩаԥысуаз амҵәышәмпыл азы атурнир иалахәын Аԥсны, Ҟарачы-Черқьесск, Екатеринбург, Ҟәбина иҟоу Славианск, Новороссииск. Волгоград рҟынтәи акомандақәа.
