VI Жәларбжьаратәи арт-пленер "Ҭагалан аԥшшәхәқәа. Аԥсны-2019" аатит Аҟәа жьҭаара 17 рзы Аԥснытәи аҳәынҭқарратә университет аҟны.
Уи иалахәуп 20-ҩык рҟынӡа апрофессионалтә сахьаҭыхыҩцәа Урыстәылеи Израили рҟынтәи, иара убас, ААУ аҟазара аҟәшеи Аҟәатәи асахьаҭыхратә школи рҵаҩцәеи рырҵаҩцәеи.
"Арт-пленер хацыркын 2013 шықәса рзы ААУ аҟны, аҟазара аҟәшаҿы аус зуа арҵаҩцәа, асахьаҭыхыҩцәа рыбзоурала. Иара ипроект бзианы иҟалеит, избанзар, изызку аҵара зҵо аҿарацәа наҟ-наҟ аҵара амҩа иқәгыло роуп. Арахь иааҳаԥхьо асахьаҭыхыҩцәа уажәшьҭа ихатәроу, арҵаҩра знапы алаку, еиуеиԥшым Урыстәыла ақалақьқәеи арегионқәеи рҟынтәи аҵараиурҭақәа рҿы аус зухьоу апрофессорцәа, арҵаҩцәа роуп, иара убас зхы иақәиҭны, асахьаҭыхратә еилазаарақәа ирылахәу. Арт-пленер Аԥсны апропагандазы ихәарҭоу акәны иҟоуп", - ҳәа азгәеиҭеит Логәуа.
Инеиҵыху аиҿцәажәара иара убас шәазыӡырҩыр шәылшоит арадио Sputnik Аԥсны аефир аҿы.
