АҞӘА, жьҭаара 21 – Sputnik, Бадраҟ Аҩӡба. Аԥснытәи аспортсменцәа Даниил Харчлааи Ричи Сыҷынааи еицықәгылон зых иақәиҭу ақәԥаразы Жәларбжьаратәи атурнир аҿы Латвиа ҳәа еиҭеиҳәеит Даниил Харчлаа иазыҟаҵаҩ Размик Алабиан.
Даниили Ричи капантә категориак – 65 килограмм – аҿы еицықәгылеит. Даниил Харчлаа актәи аҭыԥ никылеит, Ричи Сыҷынаа — аҩбатәи аҭыԥ никылеит.
"Сара Даниил ииааира сазыԥшын, агәра згон. Аспортсменцәа рҩыџьагьы ибзианы иазыҟаҵан. Срықәгәыӷуан. Ес-ҩымз Даӷьысҭанҟа ицаны аҽазыҟаҵарақәа мҩаԥыргоит, рылҵшәақәагьы шьахәуп", - еиҭеиҳәоит Алабиан.
Хара имгакәа Даниил Харчлааи Ричи Сыҷынааи даӷьысҭан имҩаԥысуа Жәларбжьаратәи атурнир иалахәхараны иҟоуп.
Зых иақәиҭу ақәԥаразы атурнир иалахәын: Латвиа, Литва, Польша, Естониа, Испаниа, Израиль, Финлиандиа, Канада, Украина, Венгриа, Чехиа, Белоруссиа, Урыстәыла, Словакиа рҟынтәи аспортсменцәа.
Аспортсменцәа аҵара рҵоит рҽагьазыҟарҵоит Калиниград, аолимпиатә резерв ашкол аҿы.
