АҞӘА, жьҭаара 23 – Sputnik, Бадри Есиава. Аџьынџьтәылатә еибашьраан хабарда ибжьаӡыз рзы акомиссиа аԥҵахоит Адәныҟатәи аусқәа рминистрраҟны. Абри аҩыза аӡбамҭа рыдыркылеит Аминистрцәа реилазаара аилатәараҿы.
Ақәҵара апроект ӡыригеит аиҳабыра раппарат анапхгаҩы Давид Сангәлиа.
"Акомиссиа аусурахь иаҵанакуеит 1992-1993 шш. рзтәи Аԥсны Аџьынџьтәылатә еибашьраан хабарда ибжьаӡыз рганахьала аинформациа аизгареи анализ азуреи. Аганқәа еинырлоит Аџьар Ҟаԥшь ала", - иҳәеит Сангәлиа.
Иааиԥмырҟьаӡакәа аус зуло акомиссиа напхгара аиҭалоит Адәныҟатәи аусқәа рминистр.
Акомиссиа аилазаара шьақәирӷәӷәоит Аԥсны аԥыза-министр. Аусура хылаԥшра азиулоит Аԥсны аԥыза-министр актәи ихаҭыԥуаҩ.
Адокумент анрыдыркыла ашьҭахь, 2003 шықәса рашәара 30 рзы Аминистрцәа Реилазаара иаднакылахьаз ақәҵара "Ахҵәацәеи хабарда ибжьаӡызи рызҵаарақәа рзы акомиссиазы аԥҟара ашьақәырӷәӷәаразы" азинмч ацәыӡуеит.
