АҞӘА, ԥхынҷкәын 17 – Sputnik, Бадри Есиава. Карате-до Шотокан Казе Ха азы ХХ Урыстәыла ахраҿаз аиндаҭлараҿы аԥснытәи акаратистцәа ахьтәы медалқәа быжьба ранашьахеит ҳәа Sputnik иазеиҭеиҳәеит Карате-до азы аԥснытәи афедерациа ахада Ахра Абыхәба.
"Аиндаҭларақәа ирылахәыз зегьы дасу рҭыԥқәа рҿы аицлабрақәа раан аиааирақәа згаз роуп. Ажәакала иреиӷьӡақәаз роуп. Аԥсны ахьӡала жәаҩык ықәгылон", - еиҭеиҳәоит Абыхәба.
Апрограмма "фукуго" аҟны ахьтәы медали "аџьаз" апрограмма "ката" аҟни лгеит адунеи хынтә иачемпионкахахьоу Николь Агәмааԥҳа. "Фукуго" аҟны 18 шықәса иреиҳабыз рыбжьара актәи аҭыԥ никылеит Владимир Литвинов.
Александр Чамагәуа апрограмма "ката" аҟны аҩбатәи аҭыԥ никылеит 12 - 13 шықәса зхыҵуаз рыбжьара, Леон Ҳаџьымба ҩынтә "аџьаз игеит " 10 - 11 шықәса зхыҵуа рыбжьара, 14 - 15 шықәса зхыҵуа рыбжьара Руслан Сабекиа апрограмма "ката" аҿы ахԥатәи аҭыԥ иоуит.
Абыхәба иажәақәа рыла иқәгылоз зегьы азыҟаҵара бзиа рыман. Аԥснытәи аспортсменцәа рзы аԥышәагьы ацын.
Карате-до Шотокан Казе Ха азы ХХ Урыстәыла ахраҿаз аиндаҭлара мҩаԥысит Тула, ԥхынҷкәын 14 - 15 рзы. 250 спортсмен, Урыстәыла арегионқәа 12 рҟынтәи иалахәын.
Иара убас шәаԥхьар ҟалоит:
- Косики карате азы Аԥсны Ахраҿаз атурнир аатит Аҟәа
-
Абыхәба: карате астиль рацәа жәларбжьаратәи арингқәа рахь ҳкылнагоит
