АҞӘА, ԥхынҷкәын 18 – Sputnik, Бадри Есиава. Акциа "Аҿар анаркотикқәа ирҿагылоуп" мҩаԥгахоит Очамчыра ԥхынҷкәын 18 рзы, абри атәы иҳәеит Очамчыра араион ахадара аҿари аспорти рыҟәша аиҳабы Ҭимур Ԥачлиа.
"Анаркотикқәа ршәарҭара атәы зҳәо афильм ддырбоит, нас иқәгылоит ҳаспортсменцәа. Иара убасгьы имҩаԥгахоит еиуеиԥшым аиндаҭларақәа", - иҳәеит Ԥачлиа.
Иара иазгәеиҭеит асасцәа рыҳасаб ала акциа дшалахәхо ажурнал "Про Бокс" аверсиала ИАРи аславиан тәылақәеи рчемпион Баҭал Чежьиа.
Асеиԥш иҟоу акциақәа Аԥсназы ихымԥадатәиуп. Анаркоманиа апроблемақәа иахьынӡалшо лассы-лассы ицәыргалатәуп ҳәа иԥхьаӡоит Ԥачлиа.
