АҞӘА, ԥхынҷкәын 26 – Sputnik, Асмаҭ Ҵәыџьԥҳа. Ашықәс ҿыц ауха Аҟәа аҩныҵҟа аус рулоит атроллеибусқәа хәбеи автобусқәа фбеи ажьырныҳәа 1 асааҭ 4:30 рҟынӡа ҳәа Sputnik иазеиҭеиҳәеит ақалақь ахадара атранспорти амҩатә ныҟәара ашәарҭадара аиҿкаареи рыҟәша аиҳабы Ҭимур Абӷаџьаа.
Атроллеибусқәа ныҟәалоит абарҭ ахырхарҭақәа рыла: "Каштак-Алашарбага", "Араион ҿыц – аџьармыкьа" , "Ажәытә ҳабла - аџьармыкьа".
Аныҳәатә уснагӡатәқәа реиҳарак ахьымҩаԥысуа Ахақәиҭра ашҭа аҟынӡа анеира ҟалоит автобусқәа рылагьы.
Ажьырныҳәа 1 инаркны ауаажәларратә транспорт абжьааԥынтәи арежим ала иныҟәалоит.
