АҞӘА, ажьырныҳәа 12 - Sputnik. Урыстәыла ахада ицхырааҩ Владислав Сурков Аԥсныҟа даауеит ҳәа Sputnik акорреспондент илзеиҭеиҳәеит Аԥсны аԥыза-министр актәи ихаҭыԥуаҩ Даур Аршба.
"Хара имгакәа реиԥылара ҟалоит, асааҭ 19:00 рзеиԥш", - иҳәеит Аршба.
Арахь иаара хықәкыс иамоуп атәылаҿы ишьақәгылаз аҭагылазаашьа уадаҩ аҭышәныртәалара, иациҵеит Аршба. Ҳаџьымбеи Суркови еиқәшәо еиқәымшәо атәы макьана еилкаам.
Аҭагылазаашьа аҭышәныртәаларазы Аԥсныҟа ажьырныҳәа 10 рзы даахьан Урыстәыла Ашәарҭадаратә хеилак ахантәаҩы ихаҭыԥуаҩ Рашид Нургалиев, Урыстәыла азинхьчаратәи амчратәи усбарҭақәа рхаҭарнакцәа рделегациа дацны. Иара диԥылеит Аԥсны ахада Рауль Ҳаџьымба, реиԥылараҟны излацәажәоз атәы дмырзеит.
Аԥсны Ашәарҭадаратә хеилак аҟны иазгәарҭеит асабшеи амҽышеи аилацәажәарақәа шымҩаԥысуаз. Иара убас ирҳәеит аганқәа аилибакаарахь икылибагарц шрабжьигоз.
Аҟәа аԥшьаша, ажьырныҳәа 9 рзы аҿагыларатә акциақәа ирылагеит, аоппозициаа рхаҭарнакцәа ахада инапынҵақәа аанижьырц адҵа ҟарҵоит.
Ажьырныҳәа 10 рзы Иреиҳаӡоу аӡбарҭа ахашшааратә инстанциа цәыббрамзазы имҩасыз ахада иалхрақәа рылҵшәақәа рзы АКХ аӡбамҭа закәаным ҳәа иазханаҵеит.
Ҳаџьымба ахашшааратә коллегиа аӡбамҭа дахашшаарц игәы иҭоуп Иреиҳаӡоу аӡбарҭа Апрезидиум ахь.
Ахада иалхрақәа ҩаԥхьа имҩаԥысны ахада ҿыц инапынҵақәа дырхагылаанӡа азакәан инақәыршәаны аҳәынҭқарра ахада инапынҵақәа наигӡалоит Рауль Ҳаџьымба.
Аха аоппозициа ахада Иусбарҭа аҿаԥхьа амитинг шымҩаԥнагац имҩаԥнагоит, урҭ Рауль Ҳаџьымба инапынҵақәа шьҭеиҵарц адҵа шықәдыргылац иқәдыргылоит.
Иара убас шәаԥхьар ҟалоит:
-
Ҳаџьымба АКХ аӡбамҭа дахашшаарц игәы иҭоуп
