АҞӘА, ажьырныҳәа 20 - Sputnik. Аԥсны ахада инапынҵақәа назыгӡо Валери Бганба иусԥҟала Зураб Занҭариа Аԥсны Аҳәынҭқаррахьчаратә маҵзура аиҳабы инапынҵақәа неигӡалоит. Абри атәы аанацҳауеит атәыла ахада исаит.
Иара убри аан 2015 шықәса раахыс Аҳәынҭқаррахьчаратә маҵзура аиҳабыс иҟаз Оҭар Берзениа ихы дақәиҭыртәит атәыла ахада инапынҵақәа назыгӡо Валери Бганба иусԥҟала.
"Берзениа Оҭар Нури-иԥа Аԥсны Аҳәынҭқаррахьчаратә маҵзура аиҳабыс дахьыҟаз аҟынтәи ихы дақәиҭтәызааит иааишьҭыз арапорт инақәыршәаны", - аҳәоит асаит адырраҭараҟны.
Зураб Занҭария диит 1967 шықәса рзы. Аҳәынҭқарратә хьчара асистемаҿы аусура далагеит 1997 шықәса рзы.
1992-1993 шықәсқәа рызтәи Аԥсны Аџьынџьтәылатә еибашьра далахәылоуп.
Аҳәынҭқарратә хьчаратә маҵзура аԥҵоуп 1992 шықәса рзы.
