АҞӘА, ажьырныҳәа 27 – Sputnik. Заанаҵтәи адыррақәа рыла 2019 шықәсазы миллиардки 800 миллион мааҭ Аԥсны абиуџьет иаланагалеит ҳәа иаԥхьаӡоит Аҳазалхратә маҵзура. Абри атәы арадио Sputnik иазеиҭеиҳәеит аусбарҭа ахантәаҩы актәи ихаҭыԥуаҩ Мсоусҭ Шамба.
"Иаҳхысыз ашықәс хра аманы имҩасит. Ҳаплан 100% инеиҳаны инагӡан. Иуҳәар ауеит заанаҵтәи адыррақәа рыла 2019 шықәсазы миллиардки 800 миллион мааҭ Аԥсны абиуџьет иаланагалеит ҳәа. Ари маҷым", - иҳәеит иара.
Шамба иажәақәа рыла, аиҳарак атауареикәыршара Урыстәылеи Аԥсни рыбжьароуп иахьымҩаԥысуа.
"Ҳәарада Аԥсны азхазҵаз егьырҭ атәылақәа рҟынтәи ҳколлегацәеи ҳареи аус еицаауеит, аха аиҳарак атауареикәыршара Урыстәылеи Аԥсни рыбжьароуп иахьымҩаԥысуа. Иара убасгьы Урыстәыла ацхыраара ҳнаҭоит акадрқәа реиҵааӡараҿы. Ҳусзуҩцәа ирымоуп алшара Москва Аҳазалхратә Академиаҿ аҵара рҵаларц. Иахьазы иара иалгахьеит 50-ҩык", - иҳәоит Шамба.
Аԥсны аҳазалхратә усбарҭа аусура мҩаԥнагоит 15 шықәса раԥхьа иҭыжьыз азакәанқәеи аинструкциақәеи рыла. Шамба иажәақәа рыла, урҭ ажәхьеит.
"Ҳгәы иҭоуп Апарламент ахь ажәадгала ҟаҳҵарц азакәан ариашарақәа ралагаларазы. Алагаламҭа ҿыцқәа атауар мҩанызго абизнесуаа рзы аманшәалара ҟарҵоит", - иҳәеит иара.
Есышықәса ажьырныҳәа 26 рзы адунеи зегьы аҿы иазгәарҭоит Аҳазалхҩы жәларбжьаратәи Имш (International Customs Day).
Раԥхьаӡа акәны аныҳәа азгәаҭан 1983 шықәса рзы.
Аԥсны иара убасгьы цәыббра 27 рзы иазгәарҭоит аҳазалхҩы Имш. 1991 шықәса цәыббра 27 рзы иаԥҵан ареспублика Аҳазалхратә еилакы.
Иара убас шәаԥхьар ҟалоит:
- Шамба: Аԥсны аԥсыӡ зкуа аӷбақәа уи анҭыҵ иргаӡом
