АҞӘА, жәабран 4 – Sputnik. Гагра араион апрокуратура ҩ-шьауск хацнаркит "Ауаҩы иԥсра ма ааха ӷәӷәа иҭара алзыршаз ахуаадаразы" азакәан ахәҭаҷ инақәыршәаны АУН "Амшынеиқәафымцамч" Гагратәи афилиал анџьныр хада Асԥар Коӷониеи АУН "Амшынеиқәафымцамч" Гагратәи афилиал атехника ашәарҭадаразы анџьныр Цира Ԥанцулаиеи рганахь ала. Абри атәы аанацҳауеит Апрокуратура хада асаит.
Ахҭыс аҭыԥ аман 2019 шықәса цәыббра 30 рзы Гагра ақалақь Абазгаа рымҩаҿы. Абри амш аҽны 2007 шықәса рзы ииз аҷкәын хәыҷы иҩызцәеи иареи реицыхәмарраан иаартыз афымцаужьга ахыбра дахьыҩналаз дҭахоит.
Апрокуратура хадаҿы иазгәарҭеит аҭакзыԥхықәу ахаҿқәа рганахь ала иахәҭаз ашәарҭадара шеиҿкаамыз.
Гагратәи афымцастанциа маҷ аҿы ахәыҷы иҭахара инадҳәаланы апрокуратура ашьаус хацнаркит.
