АҞӘА, хәажәкыра 2 – Sputnik. Афотоцәыргақәҵа "Жәашықәса Владислав ида" аартхоит хәажәкыра 4 рзы лҳәеит амузеи адиректор Мзиа Беиаԥҳа.
Лара лажәақәа рыла, ара ицәыргахоит Владислав иԥсҭазаара еиуеиԥшым аамҭақәа рҟынтәи ифотосахьақәа, авидеонҵамҭақәа, ихатәы архивтә документқәа, ауаажәларратәи аполитикатәи усзуҩцәа ражәақәа.
"Афотосахьақәа реиҳарак ижәбахьоу роуп, аха иҟоуп шамахамзар иуԥыхьамшәогьы. Иҵегьы инарҭбаау ацәыргақәҵа еиҿаҳкаауеит лаҵарамзазы, Владислав имшираан", - лҳәеит Беиаԥҳа.
Владислав Арӡынба изку афотоцәыргақәҵа аартызаауеит хәажәкыра 20 рҟынӡа. Аҩналара хәыда-ԥсадоуп.
Владислав Арӡынба – аҭоурыхтә ҭҵаарадыррақәа рдоктор, аԥсуеи асоветтәи ҵарауаҩ, Аԥсуаҭҵааратә институт адиректор, 40 инареиҳаны аҭҵаарадырратә усумҭақәа равтор, Азиа Маҷ ажәытә жәларқәа рҭоурых азы аспециалист. 1990 шықәса рзы Аԥсны Иреиҳаӡоу Ахеилак ахантәаҩыс далхын.
1992 шықәса рзы Аԥсны Аџьынџьтәылатә еибашьраан ижәлар рмилаҭ-хақәиҭратә қәԥара даԥхьагылеит, ари аибашьрагьы нҵәеит аԥсуа жәлар риааирала, ироуит иззыԥшыз ахақәиҭреи ахьыԥшымреи. 1994 шықәса рзы Владислав Арӡынба Аԥсны раԥхьатәи ахадас далхын.
Иара убас шәаԥхьар ҟалоит:
-
Инџьгьиа Владислав Арӡынба изкны: ижәлар рыхьчара далагахьан анаукаҿы
-
Аԥсны Владислав Арӡынба ибаҟа шьақәдыргылоит
