АҞӘА, хәажәкыра 5 - Sputnik. Аҟәатәи ақалақьтә ӡбарҭа аӡыбрала Аԥсны ААР апаспорттә усбарҭа аиҳабы ихаҭыԥуаҩ, закәаншьаҭада атәылауаҩшәҟә аҭаразы иаанкылаз Вадим Кәаӡба, доушьҭуп. Абри атәы аанацҳауеит Апрокуратура хада асаит.
"Ирыдкылоу аӡбамҭа заанаҵтәи аҭҵааратә усбарҭа ақәшаҳаҭым, хымш рыҩныҵҟа Иреиҳаӡоу аӡбарҭа ахашшааратә коллегиахь уи аиҭакразы азыҳәа анашьҭра агәҭакуп", - рҳәоит Апрокуратура хадаҿы.
Аусбарҭаҿ иазгәарҭеит Аԥсны ААР апаспорттә усбарҭа аиҳабы ихаҭыԥуаҩ Вадим Кәаӡба иганахь ала аусҭҵаара шхацнаркыз Апрокуратура хада аусҭҵааратә усбарҭа.
Заанаҵтәи аусҭҵаарала амилициа аполковник Вадим Кәаӡба Украина атәылауаҩ Олег Мыльцев Аԥсны Аҳәынҭқарра атәылауаҩшәҟә иҭараан имаҵзуратә напынҵақәа ихы иаирхәаны 10000 доллар иоуит ҳәа агәаанагара ыҟоуп.
Ари аус иалахәуп ҳәа агәаанагара рзыҟоуп Фатима Џьениеи Лолита Ҳалуашьи.
Вадим Кәаӡба 2020 шықәса хәажәкыра 5 рҟынӡа даанкылазарц аӡбамҭа рыдкылан 2020 шықәса жәабран 21 рзы.
Апрокуратура хада аҳәара ҟанаҵахьан иара 2020 шықәса мшаԥы 21 рҟынӡа даанкылазарц.
Иара убас шәаԥхьар ҟалоит:
- Ахада инапынҵақәа назыгӡо ауааԥсыра атәылауаҩшәҟәқәа рыҭара азҵаара далацәажәеит
