Акоронавирус аресторантә бизнес акыр ишьақәнарҟьеит

© Sputnik / Томас ТхайцукРесторан "Акалат"
Ресторан Акалат - Sputnik Аҧсны
Анапаҵаҩра
НовостиTelegram
Хәажәкыра 26 рзы атәылаҿы акоронавирус аламырҵәаразы иаркын аресторанқәеи акаҳуажәырҭақәеи. Sputnik акорреспондент еилылкаауан акарантин ари аусхк ианаҭаз анырра зеиԥшроу.

Мчыбжьқәак ирықәуп Аԥсны аресторанқәа, акаҳуажәырҭақәа, аԥацхақәа, акрыфарҭақәа аркуижьҭеи.

Арҭ аобиектқәа рыԥшәмацәа аҭагылазаашьа еиуеиԥшымкәа ирыдыркылоит. Иҟоуп ас ада ԥсыхәа ыҟам ҳәа зҳәо, иҟоуп АИХқәа ауаа дыршәоит ҳәа зҳәогьы.

Асмаҭ Ҵәыџьԥҳа, Sputnik

"Акрыфарҭа ҿыц" аԥшәма Давид Ԥлиа иҟоу аҭагылазаашьа игәы ҟанаҵо иҟам. Иара игәаанагарала, асеиԥштәи ауснагӡатәқәа Аԥсны абизнес маҷи абжьаратә бизнеси зынӡа ирхәыҽыр алшоит.

Новоафонская пещера - Sputnik Аҧсны
Усурагьы ыҟам, ԥарагьы ыҟам: акарантин акурорттә обиектқәа ишырнырыз

Абизнесуаҩ аштат аҟны 52-ҩык ауаа аанкылан иман. Урҭ уажәы улафахәыда иаанхеит, аусурҭагьы рымам.

"Макьаназ иҳамоу ацәыӡ зеиԥшроу сызҳәом. Ирацәоуп иԥхасҭахаз аалыҵ. Сгәанала 70% рҟынӡа кажьтәхоит. Акарантин аԥыххаргьы, ауаа акрыфарҭақәа рахь лассы ихынҳәып ҳәа сыҟам. Авирус ацәшәара акраамҭа иаанхоит", - иҳәоит иара.

Рҭагылазаашьа уадаҩуп Николь Лазԥҳа илтәу аресторанқәа рҳа "Akalat group". Раԥхьа иргыланы лара дзыцәшәо аусуҩцәа аԥара рызшәара лылымшар ҳәа ауп. Убри азы афатәқәа аҩныҟа рнагара алшара еиқәлырхеит.

"Аха анагарагьы ҳаҟәыҵыр акәхеит аресторанқәа руак, "Акалат Азия", аҿы. Иара ааигәоуп ианааҳартыз. Ауаа иахьа афатә хымкых аахәара рылшо иҟам, зегьы аекономиатә режим ахь ииасит", - ҳәа лҳәоит лара.

Аусуцәа реиҳараҩык рҭыԥқәа рҿы иҟоуп.

"Уаанӡатәи ҳарҳамҭақәа раасҭа 25% еиҵаны иҳарҳауеит. Иахьазы исҭаху акоуп – абизнес аиқәырхара", - лҳәоит лара.

Убри аан иазгәалҭоит иаалхәо аалыҵ ахәԥса шышьҭырхыз. Ус шакәугьы, лара илҭиуа уаанӡа ишылҭиуаз илҭиуеит.

"Мшаԥы аламҭалаз еснагь еиԥш апаскақәа ҳӡлоит, ачашәқәа ҳӡлоит", - ҳәа лҳәоит Лазԥҳа.

Беслан Кубрава - Sputnik Аҧсны
Арадио
Кәыбраа аҿкы аекономика ианаҭо анырразы: мызкала еилгар, ҳаиааиуеит

Акаҳуажәырҭа "Бисквит" адиректор Вероники Гамсаниаԥҳа илҳәоит абиуџьет 80% рҟынӡа ишкаҳаз. Аусуҩцәа аамҭа-аамҭала рҽеиҭнырыԥсахланы аус руеит.

"Аусуцәа аамҭа-аамҭала рҽеиҭнырыԥсахлоит. Аамҭа уадаҩ ҳҭагылоуп. Ауаа адәы иаҳзықәыжьуам. Ахәқәа ракәзаргьы ишьҭаҳамхӡеит" ҳәа лҳәоит лара.

Аресторан "Амгьал" аԥшәмацәагьы абизнес аиқәырхара рҽазыршәоит. Урҭ аҩныҟа афатә анагареиԥш ахархәара арҭеит аҿаҵа азынашьҭразы амаҵзура.

"Иахьазы абизнес ашьҭахьтәи апланахь ииасит. Ацәыӡқәа иахьынӡалшо раԥырҟәҟәааразы иҳалшо ҟаҳҵоит", - ҳәа иҳәоит аресторан ахаҭарнак Денис Саманба.

© Sputnik / Томас ТхайцукРесторан "Амгьал"
Акоронавирус аресторантә бизнес акыр ишьақәнарҟьеит - Sputnik Аҧсны
Ресторан "Амгьал"

Акоронавирус иадҳәалоу акризис Аԥсны араионқәагьы зацәымцеит. Афатә анагарахь ахы археит гәдоуҭатәи аресторан "Веранда", аха асала аусура есыҽны иалшом. Аҳҭнықалақь аҿеиԥш аусура ара иалшом ҳәа лҳәоит аресторан аиҳабы Илона Тарнааԥҳа.

Абиуџьет акыр ишкаҳазгьы, Илона аусуҩцәеи еснагьтәи рҭааҩцәеи адгылара рыҭаразы лусура мҩаԥылгоит.

Аресторантә бизнесуаа иҟалаша ҳәа зыԥхьагәаҭарак рзыҟаҵом. Акарантинтә режим аан рхы ахьынӡарзеиқәырхогьы рыздыруам. Уажәнатә еилкаауп зегьы ари аҭагылазаашьа лыԥхала ишзалымҵуа.

Аԥсны аҭагылазаашьа ҷыда алагалазаауеит мшаԥымза 20 рҟынӡа.

Акоронавирус иадҳәалоу аҵыхәтәантәи ажәабжьқәа шәрыԥхьар ҟалоит абра>>

 

 

Ажәабжьқәа зегьы
0