АҞӘА, мшаԥы 16 – Sputnik. Ӡыда иаанхоит аҳҭнықалақь араионқәак аӡыҭгага хада иаҿыгоу аӡымҩангагаҟны иҟалаз авариа иахҟьаны ҳәа аарыцҳауеит "Аӡыканал" аҟынтәи.
"Мшаԥы 17, 2020 шықәса асааҭ 00:00 - 18:00 рзы аӡы аанкылахоит Араион ҿыц, Ажәытә ҳабла, Адыгаа рымҩа, аинтернат аҵакыра, ашьхара иахьаԥну аҭыԥқәа рҿы. Аӡхалара уадаҩхоит ақалақь агәаны игылоу аҩнеихагылақәа рҿы", - ҳәа аҳәоит адырраҭараҿы.
Уаанӡа Sputnik ишазеиҭарҳәахьаз ала, лассы-лассы Аҟәа аӡаанкылара зыхҟьо аӡымҩангагатә ҳақәа комплексла рыԥсахра ахьаҭаху ауп. Арахь иаҵанакуеит аӡыҭгагақәа, аӡеизакырҭақәа.
