АҞӘА, мшаԥы 20 - Асмаҭ Ҵәыџьба. Акоронавирус зыхьуа Аԥсны атәылауаа ахәышәтәра иахьахысуа Гәдоуҭатәи ахәышәтәырҭа аусзуҩцәа рыҷаԥшьара аамҭа хыркәшоуп ҳәа Sputnik иазеиҭарҳәеит Ауааԥсыра акоронавирус рацәыхьчаразы аоперативтә штаб апресс-маҵзураҿы.
Ахәышәтәырҭа аусзуҩцәа жәаҩык аҽыԥхьакрахь ишьҭуп. Ачымазара ҿкы акоронавирус зыхьуа ишиашоу ирымадаз ԥшьҩык амедикцәа акарантин рхыргарц рышьҭит Аҟәа иҟоу асасааирҭа "Аиҭар" ахь. Амедусзуҩцәа зегьы аҽыԥхьакра арежим ҩымчыбжьа иахысроуп.
Апресс-маҵзура адыррала, аҽыԥхьакрахь ирышьҭыз амедицинатә усзуҩцәа зегьы ҷаԥшьон ҩымчыбжьа рыҩнуҵҟа. Уажәшьҭа урҭ рхаҭыԥан абригада ҿыц аусура иалагеит.
Абыржәаанӡа иҷаԥшьоз амедикцәа зегьы акоронавирус азы атест иахысит, урҭ ачымазара ҿкы шрылам шьақәыргылоуп.
Иҳаҩсыз уахыки-ҽнаки рзы COVID-19 азы агәаҭара Аԥсны иахысит 27-ҩык. Урҭ зегьы ачымазара ҿкы шрыламыз шьақәырӷәӷәан.
Акоронавирус иадҳәалоу ажәабжьқәа зегьы шәрыԥхьар ҟалоит абра>>
