АҞӘА, лаҵара 26 - Sputnik. Акоронавирустә чымазара уаҩы ишимам шьақәырӷәӷәахеит аҵыхәтәантәи уахыки-ҽнаки рыла игәаҭаз 42-ҩык рҟынтәи ҳәа адырра ҟанаҵоит Аԥсны ауааԥсыра акоронавирустә ҿкы рацәыхьчаразы аоперативтә штаб.
Аштаб адыррақәа рыла, асасааирҭа "Аиҭар" аҟны ихымԥадатәу акарантин ахгара аамышьҭахь рыҩныҟа иоушьҭын жәҩык акурсантцәа. Фҩык – Атәылахьчара аминистрра аганахьала аҵара иҭоу роуп, хҩык – Аҩнуҵҟатәи аусқәа рминистрра аганахьала. Дара зегьы COVID-19 рыдбалам.
Лаҵара 26 рзы Гәдоуҭатәи араионтә хәышәтәырҭа хадаҟны ишьҭоуп ачымазара ҿкы змоу 11-ҩык апациентцәа.
Апандемиа ҟалеижьҭеи Аԥсны COVID-19 рыдбалан 28-ҩык ауааԥсыра. Урҭ рахьтә 15-ҩык ргәы бзиахахьеит, аӡәы лыԥсҭазаара далҵит.
Акоронавирус иадҳәалоу ажәабжьқәа зегьы шәрыԥхьар ҟалоит абра>>
