АҞӘА, рашәара 26 – Sputnik, Асмаҭ Ҵәыџьԥҳа. Аԥснытәи абоксиорцәа Анри Аршбеи Герман Арџьениеи Подольск имҩаԥысуа аспортсменцәа реизгарахь инаԥхьоуп. Уа иалыркаараны иҟоуп ақәыԥшцәа рыбжьара абокс азы Урыстәыла Аԥхьахәгара иалахәхо. Абри атәы арадио Sputnik иазеиҭеиҳәеит атлетика хьанҭеи, ақәԥареи, абокси рзы ақәыԥшцәа рышкол адиректор, абокс азыҟаҵаҩ Альберт Карди-оӷлы.
"Ҳаспортсменцәа аепидемиологиатә ҭагылазаашьа иаҿырԥшны аҩны рҽазыҟарҵон. Аԥкырақәа шааҳхырхыз, аҽазыҟаҵарақәа ҳарӷәӷәеит. Аспортсменцәа шьақәгыланы иҟоуп. Сгәы иаанагоит еиӷьқәоу рахь иалакхап ҳәа", - иҳәеит иара.
Анри Аршба хәышықәса ҵуеит абокс инапы алакуижьҭеи. Изныкымкәа Аԥснеиԥш анҭыҵгьы аиааирақәеи аԥхьахәқәеи игахьеит. Аспортсмен Урыстәыла абокс азы еизгоу акоманда далахәуп. 57 кьыла рҟынӡа зкапануа дрыцықәгылоит.
Герман Арџьениа абокс азы Москвеи Москватәи аобласти рҟны аиааирақәа игахьеит, Урыстәыла аиндаҭлараҿы араӡны медал ианаршьахьеит, 60 кьыла иҟоу ркатегориаҿы.
Иара убас шәаԥхьар ҟалоит:
