АҞӘА, ԥхынгәы 8 - Sputnik. 2017-2019 шықәсқәа рзы Аԥсны асоциалтә-економикатә ҿиара ацхыраарарзы аинвестициатә программа аҟынтә аԥара ззоужьу аобиектқәа рыхәҭак аус рыдулара хыркәшахоит ԥхынгәымза нҵәаанӡа ҳәа адырра ҟаҵоуп Аекономика аминистрра асаит аҟны.
Иазгәаҭоуп аколоннада аиҭашьақәыргылареи Гагратәи амшынҿықәтәи апарк аԥшаҳәаҟны ахаҳә ашьҭаҵареи ҿыц ишьақәырӷәӷәаз аграфик инақәыршәаны ишымҩаԥысуа.
Аԥсны аекономика аминистр Кристина Озган лгәаанагарала, анардадаҩцәа ахьӡоит ирзарбоу аҿҳәара – ԥхынгәы 31, 2020 шықәсанӡа – русурақәа рылгара.
Аминистр даҭааит иара убас аӡыҭгагатә станциа №4, уи еиҭашьақәыргыланы иаҭан 2013-2014 шықәсқәа рзы, аха араион абалнс ахь иқәыргыламызт.
"Ари аобиект Гагра араион ахадара рбаланс ахьгьы иадкыламызт. Ииасыз фышықәса рыла уи ахархәарагьы амамызт, ахылаԥшрагьы амамызт", - лҳәеит Озган.
Абри аамҭа иалагӡаны аобиект ахыбреи уи амазареи аԥырхага ду роуит – ацәаҳәақәа зегьы хыҵәҵәан, амаҭәахәқәа ааха рыҭоуп, ауадақәа рыҩнуҵҟа аԥхасҭа ҟаҵоуп. Аспециалистцәа рнапы ианҵан аԥхасҭа иҟаҵоу ахә ршьарц, нас аобиект аиҭашьақәыргыларазы иаҭаху аԥара ахьынтәаагатәу ахыҵхырҭақәа алыркаарц ҳәа азгәарҭеит аминистрра апресс-маҵзураҿы.
