АҞӘА, ԥхынгәы 9 - Sputnik. Акарантин ашьҭахь раԥхьатәи аконцерт мҩаԥгахоит Аԥснытәи аҳәынҭқарратә филармониаҟны ԥхынгәы 15 рзы.
Афилармониа асолистцәа Нана Черқьезиаԥҳаи Алхас Ферзбеи азыӡырыҩцәа ирыдыргалоит аурыс романсқәа, европатәии урыстәылатәии акомпозиторцәа рырҿиамҭақәа рҟынтәи ариақәа. Афортепиано арҳәаҩы – Асҭанда Џьыкырԥҳа, аконцерт амҩаԥгаҩ – Есма Џьениаԥҳа.
Ишырҳәо ала, афилармониаҿ есыҽны арепетициақәа мҩаԥысуеит.
"Ҳәарада апрограмма ҿыц азҳархиоит. Аҿыцрақәа шәыдаагалоит", - ҳәа лҳәеит Афилармониа аӡыргаразы аҟаза Арифа Капԥҳа.
Афилармониа аусура аанкылан хәажәкырамза анҵәамҭазы акоронавирус инадҳәаланы. Атәылаҿ аепидемиологиатә ҭагылазаашьа инамаданы есышықәса имҩаԥыргоз аконцертқәа хԥа аҟәыхын: марттәи ажәылара ахьӡала аконцерт, аџьаз афестиваль, ахортә фестиваль.
"Аконцертқәа разырхиара иаҿуп: Кристина Ешԥҳа, Альдона Цкуәуаԥҳа, иҟалап Елена Анқәабԥҳагьы", - ҳәа азгәалҭеит Арифа Капԥҳа.
Аконцерт мҩаԥгахоит ԥхынгәы 15 асааҭ 19:00 рзы.
