АҞӘА, ԥхынгәы 23 - Sputnik. Аԥсны Агәабзиарахьчара аминистрра иаанахәеит амедицинатә маҭәахәқәа – анаркозтә-ԥсыԥлагаҩагаратә аппарат, аҳауатә концентраторқәа, апациентцәа риараҿтәи амониторқәа, аҳауарыцқьагақәеи авидеобронхоскопи, иааидкыланы 7 миллионки 530 нызқьи мааҭ рыхә ҳәа адырра ҟанаҵоит Агәабзиарахьчара аминистрра апресс-маҵзура.
1 555 500 мааҭ рыхә амаҭәахәқәа наргахьеит Гәдоуҭатәи араионтә хәышәтәырҭа хадахьы, 2 952 500 мааҭ рыхә - Ареспубликатә хәыҷтәы хәышәтәырҭахь, 672 000 мааҭ рыхә - Гагратәи араионтә хәышәтәырҭа хадахьы. Уажәтәи аамҭазы арҭ амедицинатә аппаратқәа раҿакреи русура аиқәыршәареи иаҿуп.
"Уи адагьы, Аҟәатәи ахәыҷтәы поликлиникаҿы УЗИ-аппарат ҿыц аусура иалаҳаргахьеит, уи аахәан ареспубликатә биуџьет ахарџь аҟынтәи, ирызҭазгьы Агәабзиарахьчара аминистрроуп", - ҳәа аҳәоит аацҳамҭа.
Уаанӡа иҟаҵаз адыррақәа рыла, Аԥсны Агәабзиарахьчара аминистрра анаплакцәа рхеилак "Ҳара ҳаидгылоуп" ацхыраарала зқьы ҭҵаара иазхаша аекспресс-тестқәеи Гәдоуҭатәи агоспиталь азы атомографи аархәахьан.
