АҞӘА, ԥхынгәы 24– Sputnik. Агәабзиарахьчара аминистрраҿы аҭыԥантәи аҳақьымцәеи урыстәылатәи рколлегацәеи алацәажәеит акоронавирус аныҟоу аамҭазы атурсезон аусура. Атуристтә сезон аан ачымазара змоу рхыԥхьаӡара еиҳахар алшоит иаауа рҟынтәи ҳәа иҳәеит Аԥсны Агәабзиарахьчара аминистр Ҭамаз Ҵахнакьиа.
"Ус хадас ҳҿаԥхьа иқәгылоу ҳмаҵзура акадрқәа, ахәшәқәа, аныхгатә материалқәа, асанитартә транспорт рыла арӷәӷәароуп. Арҭ рҩызцәа апрактикатә усқәа алҵшәа бзиа ҳарҭоит", - иҳәоит аминистр.
Урыстәыла Агәабзиарахьчара аминистрра аделегациа Аԥсныҟа иааиит ԥхынгәы 23 рзы. Урҭ ахаҭарнакцәа Аҟәеи Гәдоуҭеи рхәышәтәырҭақәа ирҭааит, дара раара хықәкыс иамоуп Аԥсны ахәышәтәырҭақәа аконсультатив-методикатә цхыраара рыҭара.
Урыстәылатәи аҟазауаа Гәдоуҭатәи ахәышәтәырҭа аматериал–техникатә база иахәаԥшит, аперсонал русура аиҿкаара ҭырҵааит. Аҟәатәи аҿкчымазаратә хәышәтәырҭаҿы игәарҭеит акоронавирустә инфекциазы ПЦР диагностика аҟаҵаразы абиоматериал шырго.
Амедицинатә обиектқәа рҭаара ашьҭахь Аԥсны Агәабзиарахьчара аминистр Ҭамаз Ҵахнакьиа ихантәаҩрала аминистрраҿы имҩаԥысуаз аилацәажәара рхы аладырхәит.
Иара убас шәаԥхьар ҟалоит:
- Аԥсны Агәабзиарахьчара аминистрра 7,5 миллион мааҭ рыхә амедмаҭәахәқәа аанахәеит
