АҞӘА, нанҳәа 6 – Sputnik. Ԥхынгәы 3 рзы, Аҟәа ақалақь амш аҽны иаартыз ацәыргақәҵа "Аҟәа – есымша иуцу аныҳәа" аусура хнаркәшеит нанҳәа 6 рзы.
"Аихшьаалақәа ҟаҵо иазгәасҭар сҭахуп, ацәыргақәҵа аус ауанаҵы ишаҭааз ҩ-нызқьи бжаки рҟынӡа ахәаԥшцәа. Иҳәатәуп аинформацитә маҵзура Sputnik ишҳанаҭаз алшара авидеоекскурсиа амҩаԥгараз. Аԥсни анҭыҵи ауааԥсыра уи ала ацәыргақәҵа рбеит", - лҳәоит ацәыргақәҵа акуратор Ельвира Арсалиаԥҳа.
Лара иазгәалҭеит Аҵареи абызшәатә политикеи рминистрра аԥшьгамҭала ацәыргақәҵа ишаҭааз ахәыҷқәа еиҿкаарылатәи ргәыԥқәа.
"Ацәыргақәҵа аус ауанаҵы ара имҩаԥгахеит Аҟәа аҭоурых, архитектура, абаҟақәа ирызкыз алекциақәа ҩба", - азгәалҭеит Арсалиаԥҳа.
Ацәыргақәҵа аркраан имҩаԥган ареспублика ашколқәа, Аҟәатәи асахьаҭыхратә школ, ахәыҷтәы рҿиаратә ҩны "Аинар" рҟынтәи аҭааҩцәеи асахьаҭыхыҩцәеи реиԥылара. Ельвира Арсалиаԥҳа ахәыҷқәа ацәыргақәҵа аекспонатқәа, урҭ равторцәа уҳәа ртәы рзеиҭалҳәеит.
Аҵареи абызшәатә политикеи рминистр Инал Габлиа асахьаҭыхыҩцәа қәыԥшцәа иреиҳәеит аҟазарахь ирымоу абзиабара аԥсуа культуразы аҵакы аманы ишыҟоу, ирзеиӷьеишьеит ақәҿиарақәа. Аминистр иара убасгьы ацәыргақәҵа аиҿкааҩцәа иҭабуп ҳәа реиҳәеит.
Ԥшьышықәса анылхыҵуаз аахыс иҭыхуа Екатерина Гуськова лҩызцәа ирзеиҭалҳәеит лхатә ҭоурых.
"Сандуи сареи Асахьаҭыхратә школ ахь саҳәшьа днаагеит. Лара уа дыҟанаҵ ҳара ааигәа ҳнеиааиуан. Арҵаҩы санду длазҵааит аиҵбгьы ашкол дзашәымҭои ҳәа. Убри аахыс ақыцә снапаҿы искуп", - лҳәеит лара.
Ацәыргақәҵа хыркәшахеит ареспублика ашколқәа рҟынтәи аҭааҩцәеи асахьаҭыхыҩцәеи реиԥыларала. Асахьаҭыхыҩцәа еиҭарҳәон рҟазараҿы Аҟәа, иара архитектура, абаҟақәа ҭыԥс иааныркыло атәы. Аҭааҩцәа ирыман алшара ирҭаху азҵаарақәа рыҭираз.
Аҟәа ақалақь амш азы иаатыз ацәыргақәҵа "Аҟәа – есымша иуцу аныҳәа" шьақәгылоуп ХХ-тәи ашәышықәсеи ҳаамҭазтәии аԥсуа сахьаҭыхыҩцәа Аҟәа иазку рҭыхымҭақәа 49 рыла.
Ара иҟан асахьаҭыхыҩцәа - Баҭал Џьапуа, Александр Семенцов, Мадина Бигәааԥҳа, Руслан Габлиа, Диана Хынҭәԥҳа, Витали Қацәба, Лаша Габелиа, Амиран Адлеиба уҳәа егьырҭгьы русумҭақәа.
