АҞӘА, абҵара 12 - Sputnik. Асовет ԥрыҩцәа рбаҟа шотландиатәи ақалақь Еррол аҿы иқәдыргылеит ҳәа аанацҳауеит РИА Новости, Лондон иҟоу Урыстәыла ацҳаражәҳәаҩ Андреи Келина иажәақәа ҵаҵӷәыс иганы.
"Иахьа, абҵара 11, аибашьра афырхацәа ргәалашәара Амш азы Аҩбатәи адунеизегьтә еибашьра еилгеижьҭеи 75 шықәса аҵра иазкны шотландиатәи ақалақь Еррол иқәдыргылеит асовет ԥрыҩцәа рбаҟа", - аҳәоит ацҳаражәҳәаҩ иҟаиҵаз аҳәамҭаҿы.
Абаҟа ақәыргылара алыршахеит урыстәылааи британиааи хатәгәаԥхаралатәи рҽазышәарақәа ирыбзоураны.
Келин иажәақәа рыла 1943 шықәса рзы Британиа аиҳабыра Асовет Еидгыла цхыраагӡас иарҭеит ҩ-моторк змаз абомбакажьгақәа "Албемарл".
Урҭ раагаразы Москватәи авиагәыԥ ахаҭарнакцәа нашьҭын аҳаиртә баӷәаза Еррол ахь. Уа дара алархәын Акралтә арра-ҳауатә мчрақәа иҷыдаз 305-тәи ротриад.
"1943 шықәса, лаҵарамзазы, аҽазыҟаҵаратә ԥырраан "Албемарлқәа" руак аекипаж ҭахеит. 2019 шықәса лаҵарамзазы шотландиатәи ақыҭа Фернан аҿы дара рыхьӡала иаадыртит амемориал. Иахьа ҳара ақалақь Еррол агәҭа иқәҳаргылоит Урыстәылантәи иаагоу ахаҳә цәы", - иҳәоит Келин.
Амемориал ақәыргылара асоветтәи британиатәи ажәларқәа ҩашьара зқәым рыиашьара иашьаноуп. Абаҟа авторс дыҟоуп карелиатәи аскульптор Александр Ким, апроект ҟаиҵеит – Иван Иудинков, иҭахаз аԥрыҩцәа руаӡәк имоҭа.
