АҞӘА, ԥхынҷкәын 5 - Sputnik. Латвиа Аҳәынҭқарратә шәарҭадаратә маҵзура ԥхынҷкәын 3 рзы аԥшаарақәеи аҿахәҿыхрақәеи мҩаԥыргеит. Астатиа зкьыԥхьыз авторцәеи урыстәылатәи апорталқәа Baltnewsи Sputnik Латвиеи ртехника рымырхит. Амаҵзура аусзуҩцәа ааныркылеит, рҿахәы рҿыхны иоурышьҭит фҩык латвиатәи авторцәа, Baltnews.lv уаанӡатәи аредактор Андреи Иаковлев, апублицист Владимир Линдерман, ажурналистцәа Андреи Солопенкои, Алла Березовскаиеи ҳәа аанацҳауеит Sputnik Латвия.
Латвиа Аҳәынҭқарратә шәарҭадаратә маҵзура аҿы иазгәарҭеит арҭ апроцессуалтә усқәа шымҩаԥгаз 2020 шықәса ажьырныҳәа 16 рзы излагаз ашьаустә процесс инақәыршәаны: Евроеидгылеи егьырҭ жәларбжьаратәи аиҿкаарақәеи иаларгалаз асанкциақәеи Латвиа иаланагалаз амилаҭтә санкциақәеи реилагаразы (Латвиа АЗ ахәҭаҷ 84).
Убри аан ҷыдала иазгәаҭоуп МИА "Россия сегодня" адиректор хада Дмитри Киселев 2014 шықәса рзы иқәҵаз асанкциақәа. Арҭ АИХқәа рзы иҩуа латвиатәи ажурналистцәа аштатнҭыҵтә авторцәоуп.
МИА "Россия сегодня" адиректор хада Дмитри Киселев ахҭыс РИА Новости аҿы ахҳәаа аҭо иазгәеиҭеит, хаз аӡәы изырхо асанкциақәеи урыстәылатәи аиҿкаарақәеи аилахәырақәеи рганахьалатәи аԥкырақәеи ак шракәым.
Иара иҳәеит ЕЕ асанкциақәа ҷыдала иара хатәхаҿык иеиԥш дышрыҵаркуа. Аха МИА "Россия сегодня", амаҵзура Sputnik зҵазку, асанкциақәа ирыҵагылаӡом.
"Латвиа апап иаасҭа иԥшьазар аҭахуп, ахаҭалатә санкциақәа аиҿкаарақәа ирҿагыло асанкциақәа реиԥш иахәаԥшуеит", - иҳәоит иара.
Иара латвиатәи амчрақәа рахь ааԥхьара ҟаиҵеит ртәылауаа рышьҭазаара иаҟәыҵырц, урҭ цәгьарак рымузар.
Урыстәыла Адәныҟатәи аусқәа рминистрраҿгьы иақәыӡбеит латвиатәи амчрақәа рхымҩаԥгашьа урысбызшәала иҩуа ажурналистцәа рганахь ала. Иҟалаз "АИХқәа рхақәиҭреи ахатә гәаанагара аҳәареи ирҿагылоу ҿырԥшуп" ҳәа азгәарҭеит дара. Урыстәыла ААР иагәҭакуп ари азҵаара ОБСЕ аҿаԥхьа ацәыргара.
МИА "Россия сегодня" RT аредактор хада Маргарита Симониан дгәыӷуеит Урыстәыла иахәҭоу аҭак ҟанаҵап ҳәа.
Латвиа ашьаустә закәанеидкыла инақәыршәаны асанкциақәа реилагара иазку астатиазы аԥаратә хараԥса инаркны аҭакраҟынӡа аҵаргылара алшоит.
Амаҵзура аиуристцәа аҭагылазаашьа аҭышәныртәалара напаларкит.
