АҞӘА, ажьырныҳәа 30 – Sputnik, Асмаҭ Ҵәыџьԥҳа. Аԥсны иахьаҵанакуа афымцамч ахархәара лаҟәит 400 мегаватт рҟынӡа уахыки-ҽнаки рзы ҳәа Sputnik иазеиҭеиҳәеит "Амшынеиқәафымцамч" адиректор хада ихаҭыԥуаҩ Зураб Багаԥшь.
30 Ажьырныҳәа 2021, 09:41
Иара иажәақәа рыла, араионқәа роперштабқәа ареидқәа рымҩаԥгара иалагаанӡа афымцамч иаҳа ахархәара аныҳаракыз 475-480 мегаватт рҟынӡа иҩаӡон.
"Абасҵәҟьа афымцамчхархәара ҳаракны уаанӡа ахаан иҟамлацызт", - иҳәеит иара.
Ажьырныҳәа 22 рзы Аԥсны ахада Аслан Бжьаниа атәыла афымцамчтә кризис азҵаарақәа ирызку аилацәажәараҟны адҵа ҟаиҵеит афымцамч ахархәара ладырҟәырц 2019 шықәсазтәи арбагақәа даҽа хә-процентк ацны рҟынӡа. Багаԥшь иажәақәа рыла, хара имгакәа "Амшынеиқәафымцамч" афымцамчхархәара процентла еиҿырԥшны анализ ҟарҵараны иҟоуп.
