АҞӘА, жәабран 22 - Sputnik. Аԥсны иҟоу аладатәи арратә округ арратә база атанкистцәа Урыстәылазегьтәи ахәыҷы-қәыԥштә арра-патриоттә еиҿкаара "Юнармия" аотриадқәа рлахәылацәа иддырбеит ҳаамҭазтәи аибашьыга танкқәа Т-72Б3. Абри атәы аанацҳауеит Аладатәи арратә округ апресс-маҵзура.
Арратә база аҵакыраҿы имҩаԥгаз аекскурсиа аҳәаақәа ирҭагӡаны ахәыҷқәа идырбан амобилтә комплекстә тренажер МКТ-188А, атанкқәа Т-72Б3.
"Атренажер ҷыдараны иамоуп аамҭакала аекипаж акоманда зегьы реиҽцазыҟаҵара амҩаԥгара, акомандир инаиркны ақәкҩи, амеханик-ныҟәцаҩи рҟынӡа", - аҳәоит адырраҭараҿы.
Уи адагьы акомплекс апрограмматә еиқәыршәара еиҿнакаауеит авиртуалтә еибашьратә ҭагылазаашьа ашықәс аамҭеи, амши-аҵхи, аҳауатә ҭагылазаашьеи, агеографиатә ҟазшьеи азыԥхьагәаҭаны. МКТ-188А аамҭакала иунарбоит 15 рҟынӡа цәҟьара 100 - 4000 метра рҟынӡа инахараны, сааҭк ала 60 километра рныҟәара аццакыра аманы.
Ауснагӡатә ахыркәшара ашьҭахь аррамаҵзурауаа ахәыҷқәа рзы еиҿыркааит атанк Т-72Б3, апарки атанкодроми рҿы аԥкырақәа ирхысны аныҟәара дырбара.
Аԥсны иҟоу аладатәи арратә округ арратә база аҵакыраҿы аекскурсиа иалахәын Аҟәеи Гәдоуҭеи рҟынтәи ашколхәыҷқәеи, арратә база аррамаҵзурауаа рхәыҷқәеи.
