Асериал "Ихьыԥшым" ("Независимый") жәа-сериак рыла ишьақәгылазаауеит, раԥхьатәи ԥшь-сериак рыҩхьеит, ҩ-сериак рҭыхра иалагахьеит. Апроект иазыразхахьеит, ахә ашәоит урыстәылатәи аплатформа "Start".
"Асериал ддырбалоит "Start" аҿы, урҭ асценари ргәаԥхеит, дара аҭыхра рыхә ршәоит, хымԥада, аҭыԥантәи аусбарҭақәа адгылара аадырԥшит, АҶА, ААР, АШәМ, Атәылахьчара аминистрра, иара Аԥсны зегьы ҳацхраауеит", - иҳәеит Ҭемыр Ҭаниа.
Аҭыхратә гәыԥ 70% рыла Аԥсны атәылауаа рыла ишьақәгылоуп, Урыстәылантәи иадрыԥхьалаз агримҟаҵаҩцәа, алашаразы арежиссиорцәа, абжьы арежиссиорцәа, апиротехникцәа роуп. Урыстәыла атеатри акинои ателехәаԥшреи рактиор Ашот Кешьангьы шьҭрала д-Аԥснытәиуп.
Аҭыхратә процесс напхгара аиҭоит арежиссиор Ҭемыр Кәакәасқьыр, инықәырԥшшәа, асериал ҭыхны иалгараны иҟоуп аԥхын анҵәамҭазы. Ҭемыр Ҭаниа, Ҭемыр Кәакәасқьыр, Руслан Шьакаиа рыхьӡ ауаа ирылаҵәеит КВН акоманда "Аԥснытәи Нарҭаа" ("Нарты из Абхазии") иаланы ианықәгылоз, аиумортә проектқәа "Алаф-клаб", "Баша-маша", афильм "Иҭабуп, даду, аиааиразы" ("Спасибо деду за Победу") иара убас егьырҭ апроектқәа рыла.
