АҞӘА, рашәара 16 – Sputnik. Апансионат "Ауадҳара" асасцәа рыдкылара иазыхиоуп 2021 шықәсазтәи асезон азы ҳәа арадио Sputnik иазеиҭеиҳәеит Риҵатәи амилаҭтә парк аекскурсиақәеи атуризми рыҟәша аиҳабы Едлан Багаҭелиа.
"Ҳара иаҳҭаауа зегь рыдкылара ҳазыхиоуп, аҭыԥантәиқәа реиԥш, атәыла асасцәагьы. Иахьазы ихиоуп 80 ҭыԥ. Сынтәа иааҳартит акоттеџь ҿыцқәа. Апансионат иахәҭоу аинвентарь ала еиқәыршәоуп", - ҳәа иҳәеит иара.
Багаҭелиа иазгәеиҭеит апансионат аҵакыраҿы аргылара ишаҿу аномертә фонд змоу аҩбатәи акорпус, аха иазгәеиҭеит уи 2021 шықәсатәи асезон ишырзахьымыгӡо, акоронавирустә пандемиа иахырҟьаны. Иара дақәгәыӷуеит иааиуа ашықәс азы аусура иалагап ҳәа.
"Ауадҳара" аԥсшьаразы ахәԥсақәа шыҟаз иныжьуп. Багаҭелиа иажәақәа рыла, идырҳауа аԥара аиҳарак апансионат нападкылара иахҭнырҵоит, аусзуҩцәа руалафахәы ршәоит.
Ахәԥсақәа рганахьала атәыла ауааԥсыра рзы ихазны, аԥыжәаратә тарифқәа шьақәыргылоуп.
"Апансионат аҵакыраҿы жәа-ҩнык гылоуп. Аҭыԥантәиқәа рзы уахыки-ҽнаки раренда 3000 мааҭ иаԥсоуп, Нанҳәамзазы – 4500 мааҭ. Атуристцәа ракәзар, 5000 мааҭ ршәоит", - ҳәа иҳәоит иара.
Багаҭелиа иажәақәа рыла, аиҳарак арахь ԥсшьара инеиуа аҭыԥантәи ауааԥсыра роуп. Акурорттә сезон азы абронҿаҵара иалагахьеит. Нанҳәамзазы аномерқәа зегьы ҿарҵахьеит.
