АҞӘА, рашәара 17 - Sputnik. Гәдоуҭа араион Приморское ақыҭан инхо Гочуа Санард Гиви-иԥа, 1991 шықәсазы ииз, Аԥсны ААР УКОН аусзуҩцәа дааныркылеит аоперативтә информациа аус адулараан, Бармышь ақыҭатәи абнараҿы ҳәа аанацҳауеит Аԥсны ААР апресс-маҵзура.
Аԥсны ААР УКОН аиҳабы Асҭамыр Ԥачалиа иажәақәа рыла, аоператив-техникатәии аԥшааратәии уснагӡатәқәа раан анаркохылаԥшра аҟәша аусзуҩцәа дшьақәдыргылеит Гәдоуҭа араион ақыҭақәа рҿы анаркотикатә маҭәашьар, аметадон аҵәахра мҩаԥызгоз ахаҿы.
УКОН аусзуҩцәа уахи-ҽни анаркотикқәа шьҭарҵар ахьалшоз аҭыԥқәа рмониторинг мҩаԥыргон. Рашәара 7 рызтәи аоперативтә уснагӡатәқәа раан даанкылан Гочуа Санард Гиви-иԥа, агеолокациа аниоулак ашьҭахь аҭиразы анаркотикқәа рпартиа ду аҵәахырҭаҟынтә ицәырызгоз.
Ашьаус аматериалқәа рыла Гочуа, Telegram ахархәарала ишьақәыргылам ахаҿы диҿцәажәон Аԥсны аҵакыраҿы анаркотикқәа рышьҭаҵаразы. Анаркотикатә маҭәашьар, аметадон агеолокациа акоординатқәа зауз Гочуа иарбаз аҭыԥ аҿы амилициа дааныркылеит.
Санард Гочуа иганахьала ашьаус хацыркуп "анаркотикатә маҭәашьарқәа закәаншьаҭада раахәареи рыҭиреи уаанӡатәи еицәажәарыла гәыԥҩык ахаҿқәа имҩаԥыргаз" ахәҭаҷ ала.
