АҞӘА, рашәара 19 – Sputnik. Рашәара 22 инаркны Ҭырқәтәылеи Урыстәылеи рыбжьара аҳаиртә еимадара еиҭахацыркхоит, лҳәеит Урыстәыла аԥыза-министр ихаҭыԥуаҩ Татиана Голикова. Абри атәы аанацҳауеит РИА Новости.
Ас еиԥш аӡбамҭа адкылара иалҵшәахеит гәыԥҩык Урыстәылатәи агәаҭаҩцәа ари атәыла ианаҭаа ашьҭахь. Голикова лажәақәа рыла Ҭырқәтәыла еиҿкаарыла аԥсшьарҭақәеи асасааирҭақәеи русуҩцәа 60-90 наӡаныла еиҿкаарыла алаҵа ҟарҵеит.
Урыстәылеи Ҭырқәтәылеи рҳаиртә еимадара аанкылан мшаԥы 15 инаркны. Аӡбамҭа рыдыркылеит Ҭырқәтәыла аепидемиологиатә ҭагылазаашьа акыр ианыуадаҩха. Усҟан уахыки-ҽнаки рыла 60 нызқь-ҩык ауааԥсыра акоронавирус шрыхьыз ала ашәҟәы иҭагалан.
Рашәара 28 инаркны, Урыстәылеи даҽа аа-ҳәынҭқарраки рыбжьара аҳаиртә еимадара аартра азгәаҭоуп. Голикова ишазгәалҭаз ала, уи асиа ианылеит Америка, Болгариа, Италиа, Кипр, Бельгиа, Иорданиа, Ирландиа, иара убас Аҩадатәи Македониа.
